Friday, March 30, 2007

رباعياتي

دورت وسط الورود على وردة تشبهك

ما لقيت ورجعت والقلب ناوي يعشقك

لكن لما دققت فيكي النظر لقيت

إنك مش وردة بس الزينة كانت غطتك

***************

ماشي في وسط الطريق بدور

على ابتسامة أمل أو فجر طالع ينور

لكن بعد طول اللف لقيت

من ظلام الدنيا اللي ما كنتش اتصور

***************

يا طير ياللي ف السما طاير وديني

على بلاد الحبايب هناك و ارميني

حبايبي اللي شاددني ليهم كتر شوق

نظرة واحدة من عيونهم بس ترويني

***************

يا اللي تضيع صلاة الفجر وتنام

بقى تغضب بكتر النوم رب الأنام؟

طب بس انزل صلي وانت تشوف

حلاوة السما وتسمع أحلى الكلام

***************

حديدة مربوطة بحديد طالع لها حديدة

بضغطة زر بس بتكلم الناس البعيدة

عجبي على دي الدماغ سبحانه خلقها

لاجل تعمل لنا كل يوم حاجة جديدة

***************

الحزن ساكن في القلب مرتاح

ولا يخْرجه حتى طول الصياح

لكن ع البعد لقيت باب الفرح

جيت افتحه بس تاه مني المفتاح

***************

مليانة الدنيا علامات استفهام

مين وليه عشانيه وكام

لكن بعد طول الحيرة لقيت

إن الجواب في كتاب رب الأنام

***************

حاطط إيدي على خدي بفكر

ليه الدنيا فيها المر والسكر؟

رجعت بعد طول الضنا قلت

ياخي سيب الخلق للي خلق ودبّر

***************

خايف إن القلم يشوف الدنيا سودة

وان كل الحاجات الحلوة ما عادتش موجودة

وبعدك روحت ادور على أحزاني

لقيت مدينة احزاني حجارة مهدودة

***************

يا مصري الهم عليك اتسلّى

قطّع فيك هو وما خلّى

حاولت تغلبه بس ما قدرتش

اتتريقت عليه قام ولّى

***************

قاعد ماسك ربابتي ومزاميري

أقول اي كلام يطرا على تفكيري

عدت عليا بنت حلوة قلت اغازلها

لقيتني بحن للشارع اللي شاف مشاويري

***************

تتوه عيوني في جمال العيون

زرقا وخضرا ومليانة شجون

ألوان كتير وأشكال أشوفها

لكن أحب عيونك يا مصر كيف ما تكون

***************

بين البنادق وتحت النار

فوقي دبابة والشهدا كتار

بسأل نفسي فين انا فجأة لقيت

إني بجري م السرير للفطار

***************

يا بو الفوارس ترهب الجدعان

مذكور بالقوة في جميع الأزمان

لكن لوحد شاف قلبك هيلاقي فيه

رقة ودموع وشجون و الأحزان

***************

حبيت انا أرسم ولد بريء

وبنت معاه بيعدوا الطريق

لكن خطوطي فجأة تاهت

عشان ضيعت زحمتنا الرقيق

***************

حاوي وألعابي الحروف

بخرج بها عن المألوف

بحس ان انا رزين جدا

وساعات بحس ان انا مهفوف

***************

مش كل طير ف السما يبقى بريء

ولا كل قطر الندى يبقى رقيق

احلم ياقلبي زي ما تحب انت

لكن فرّق بين الزايف والحقيق

***************



باسم زكريا

أهواك

أهواكِ ولا أتَعَمَّدُهُ **** فهواكِ لسْتُ بأنْشُدُهُ

قدرٌ للقـــلب يدبره **** من خلق الكون وصوره

قد أضنى القلب وعذبه **** شوقٌ للحِبِّ يؤرقه

ويضيع العمر من البحثِ **** عن وصل ٍ عزَّ تنوُّله

حُبٌّ للقلب هو السكنُ ****مابال الواقع يجحده

قد صار القلب له طـَوَعا **** فلقد فارقت تحَكـُّمَهُ

والقلب العاشق أُرْغِمَهُ **** أن ينسى الحب وينكره

فيطاوعني قلبي ينسى **** ثم الأشواق تذكـِّره

ولطول عذابي أسألـُهُ **** فيجيبُ : خُلِقَ لِـيَعْشَقـَهُ

وأراها تشرق كالقمر ِ **** في النور ِ ليس لها شبهُ

وسْنى إن تنظر في عطفٍ **** فتقيم الكون وتقعده

حيـَّرْتِ الطير وقد سكتَ **** لا يدري اللحن ليعزفه

فالشمس النظرة تبردها **** والبدر الطلعة تخجله

والعود الأهيف يأسرني **** فمع النسمات تمايله

تمشي يهتز لها الكونُ **** وكأن خطاها تـُسْعِدُهُ

والبحرُ الضِحْكة ُ يـَنـْشُدُها **** والزهر الهمس يعطِّرهُ

وأشمٌّ ينظر من علٍّ **** بالبسمة كان تهدهدهُ

وأراها أغنية ٌ كتبتْ **** سحرٌ في الكون يجمِّـلـُهُ

والشوق قفارٌ أقطعها **** بجوادٍ غاب مروِّضُهُ

ويطول عذابي إن قــَرُبَ **** ميعادٌ طال ترَ قـُّبُهُ

والدمع العين تجاهده **** لكن القلب يطاوعهُ

ودموع القلب لها مثلٌ **** مرٌ في القلب يعذبهُ

ومرَّ عذابِ منك فلن **** ينسيني حسن مُعَذ ِّبِهُ

ما أحلى مرَّ عذاب حبيـ **** ـيبٍ مفتاحُ القلب تَمَلـَّكَهُ

قد حان الوقت لكي تدري **** بالشعر ِ فيمن أنشُدُهُ

فإلى عينيك سرى قلمي **** للروض ِ يقطف أطيبهُ

باسم زكريا

ابكي يا قلبي

ابكي ياقلبي
على لحن أحلى دبكة
ع الربابة والعود
وصوت آذان مكة
ليه يا عرب اتفرفطنا
وبقينا شوية فكة
وليه يدنس ترابنا
شوية ناس سكة
********

ابكي ياقلبي
علشان خلّوا الخواف
يعمل فينا ويسوي
كل اللي كان منه يخاف
ما هي طول ما إيدينا بتتكـَتـَّـف
وقلوبنا زهورها بتتقطـّـَف
في وشوشنا هيحطوا جزمهم
وعلى جثثنا هيقيموا فرحهمة
********
ابكي ياقلبي
على ناس بيقولوا
ايه يعني الشهدا بيموتوا
طول ماكروشنا مليانة
ايه يعني يومين حزن وهيفوتوا
طول ما جيوبنا دافيانة
ايه يعني دموع الشعب الغلبان
مايومين وهينسى
ما ياما شافوا من العذاب الوان
ولا حد فيهم قال يقسى
طول عمرهم كده غلابة وراضيين
م العين يصونهم رب المساكينة
********
إنما لأ بنقولها بنار
بقى دلوقتي بينا وبينهم تار
لو فكرتوا ف يوم تاخدوه
هنجري وراكوا المشوار
بس لو ناويين تسيبوه
عليكوا تحرم أرضنا
وسماها اللي بتضلنا
وترابها اللي عطره نسيم
بيفوح على كل الأمكنة



باسم زكريا

أوهام النسيان


أحقا سوف أنساكِ

وأنسى نسمة سكنت

بنبض وقلب وجداني

وأعشق بسمة أخرى

تداوي جروح أحزاني

أأنسى طائرا عبرَ

بين غصون بستاني

وأنسى بلبلا غردْ

بصوت الحب ألحاني

أأنسى مركبا هدأت

على ميناء أجفاني

وإن نسيتك أبقى

لنبع الحب ظمآن ِ

وكيف أنساك يا قمرٌ

أضاء العمر قدامي

وحين نسيتك يوما

وجدت القلب يهواكِ

***************

أحبك نسمة تسري

أمام خطاي ترعاني

أحبك زهرة تنبت

بوسط صحاري جُدبان ِ

عشقتك فكرة توحي

إلي بكل أشعاري

عشقتك شمعة تذكي

بليل الحزن أشجاني

أضاءت عمري وانطلقت

تنوِّر كل ظلماء ِ

فأنت هواك في قلبي

كطيف زار أحلامي

وأنت كالندى يسري

على أوراق أغصاني

وأنت مناي في الدنيا

وملكك كل أيامي

وكيف أعيش في بحر ٍ

وغير عيونك شطآني

وكيف أضمد الجرح َ

بغير حنان يمناك ِ

حبيبتي.....

وحين نويت أنساكِ

وجدت القلب يهواكِ

باسم زكريا

Tuesday, March 27, 2007

من وحي التعديلات الدستورية

هبت علينا رياح تجديد

من بهوات عز وحديد

وقفوا..اتنفخوا..اتمعظموا

احم..احم..هنقول بيان

واسمعي يا كل الودان

قالوا هنعدّل قانون

قلت ده والله كلام موزون

بس فيه معارضة قالت

دا كلام هجس وفاشوش

ردوا عليهم قالوا لأا

انتوا الجهّال مابتفهموش

انتوا جواسيس ويمكن عملا

وان دول شدوا دولا يرخوا

وانا هيصيبني ياناس جنون

**********

قلت انا أعرف ايه الحكاية

قمت فتحت التليفزيون

لقيت أغاني وطني دايرة

والسهتان عامل لي فيها

قال نصير المحرومين

قال بيغني للغلابة

ويسبل شمال ويمين

المهم ده مش حوارنا

من كتر الأغاني قلت

احنا أكيد رحنا نحارب

الأبالس الصهيون

ونرجع إلقدس تاني

ونحنّي غصون الزيتون

قالوا يا ابني أكيد بتحلم

دي الحكاية إن مصر

جتها لحظة

فيها كبرت

هتخطي العتبة بقدمها

طب يا اخويا ألف بركة

قالوا ما تتّريقش دا احنا

سايقين السفينة دايما

لحد ماتروح للأمان

*********

- طب يا اخويا قول لي طيب

= يا ابني الدعم دا كان زمان

بيضيّع فلوس كتير

والحكاية إنه لازم

واحدة واحدة قوام يطير

- والغلابة؟

= ياكلوا فينوا

- واللي معوش؟

= مايلزموش

- قول بقى كده م الأول

ده تخطيط شيطان مدهول

لاجل ما يملا الكروش

لاجل ما يعيش ف العلالي

بعيدا عن كل الهاموش

= انت بتخطط لداهية

- داهية ايه؟

= إرهابي انت

والقانون جديده يجعل

بالظنون الصايبة مني

ألفـّـفك على ميت لومان

وبعد بهدلة بلاوي

روح اشكيني لأي قاضي

ده إن كان لساك بتقدر

عالقدمين تسير وتمشي

- طب نغير الموضوع؟

الوريث؟

= الله يعينه

ويثبت ف الأرض دينه

- وان رفضنا ؟

= شعب خايب

قال بيفهم قال مثقف

انت شغلتك تسقف

- طب لمين قول لي طيب

وبأمارة ايه اسقف؟

= انت هتسأل برضه تاني؟

انت هتسقف لباشا

من زمان وهو باشا

وابنه بيه صغير لكن

بكرة ياكل م الفطيرة

ع العموم هي عزبة

وانتوا اللي بترعوا فيها

- هي دي الديمقراطية؟

= أيوة يا اخويا هيـّـة ديـّـة

ماتعملش انك بتفهم

دا انت يا ابني لسة طالب

اجري يالا على دروسك

وانسى جرايد المعارضه

دول دسايس دولا يبغوا

فرقة الشعب العطيم

المصارى الغلابة

اللي عايشين طيبين

يحميهم بارينا دايما

من عيون الشمتانين

باسم زكريا

وربنا يستر

Monday, February 12, 2007

افتح قناة

إلى هؤلاء الذين أفسدوا عقولنا

لو انك غني

فافتح قناة

قلّع هدوم

عرّي العيوب

وافتح قناة

قلّ الأدب

قول دا طرب

وافتح قناة

نافق وميّس

أبج كويس

وافتح قناة

ارزع فضيحة

ولو دي طريقة

لكسب المعاش

فافتح قناة

ومن الفضايح

لمّ الدبايح

وافتح قناة

انسى الخلق

خش السبق

وافتح قناة

وان حد قال لك

عيب اختشي

قول له ع مهلك

ولا انت شايفني

بالعيب مكتسي

بجّح في وشه

قبّح كمان

وان جاك تهشه

وسد الودان

وافتح قناة

باسم زكريا

ابن مصر الصغير

Monday, February 5, 2007

كيف ضاعت هوية مصر؟؟

إن المتأمل في عبقرية مكان مصر يجد أن مكاننا الاستراتيجي أهلنا كمصريين لأن نري العالم اجمع ولكي يرانا العالم أجمع وقد أهلنا أيضا لأن نحتل مكان الصدارة والقيادة على ثلاث دوائر متداخلة وهم الدائرة العربية والدائرة الإسلامية والدائرة الإفريقية و ظلت مصر هي حلقة الوصل بين تلك الدوائر وظلت هي ترمومتر أداء هذه الدوائر على المحافل الدولية جميعها
والمتأمل في إرث أي أمة يجد أن أغلى ما تمتلكه أي أمة هو الدين ثم اللغة ولكن مصر كدولة غيرت دينها ولغتها ثلاث مرات فأولا كان دينها هو عبادة الفرعون وتعدد الآلهة واللغة الفرعونية ثم الدين المشيحي واللغة القبطية ثم أخيرا الدين الإسلامي واللغة العربية ، ومع كل هذه التقلبات الحادثة على مر التاريخ نجد الشخصية المصرية محتفظة بهويتها لم تتغير ولم تتزعزع بل كانت مساهمة بشكل كبير في إثراء كل دين أو لغة اعتنقتها وإذا أخذنا اللغة العربية مثلا نجد مثلا أن التطوير في مدارس الشعر العربي كله كان رواده مصريين أمثال البارودي وشوقي وناجي أو من الشوام الذين تأثروا بمصر أمثال جبران خليل جبران ومطران خليل مطران وإيليا أبو ماضي
ظلت الشخصية المصرية محتفظة بعبقريتها الوسطية فلم تنحل تماما كالنموذج الغربي ولم تتشدد تماما كنموذج الجزيرة العربية وإنما أنشأت نموذجا فريدا خاصا بها جمع بين ما هو حسن في الغرب من ذوق رفيع نعترف به وأناقة نشهد لها من غير أن نتحول لمسوخ ، وما هو حسن من الشرق من التزام بالأصالة وعودة للأصول وإجلال علماء الدين والاحتفاء بهم و حب الدين والالتزام به بلا تشدد أو تعصب
لكن للأسف نجد الآن محاولات ضارية لمسخ هذه الهوية وتمزيقها وإني لأنتحب كمدا حين أعترف وأقر أن هذه المحاولات تبدو ناجحة إلى حد بعيد فأصبح الدين عندنا صورة وأصبحنا نستقي كل فتاوينا من علماء ومشايخ السعودية وهم يفتون بم يناسب جغرافيتهم وتراثهم الصحراوي و نسينا أن من علماء مصر من كان يدرس العلوم الشرعية في جامعاتهم كالشيخ سيد سابق وغيره كثيرين .أصبح التحضر عندنا يقاس بمدى تقليد الغرب وبكم الكلمات الغربية التي "تحشرها" في كلامك بمناسبة أو بغير مناسبة .
كل ذلك كان نتاجه تذويب للهوية المصرية وتغييب لدور الريادة الذي تمتعت به مصر على كافة الأصعدة فنجد أننا في الموسيقى مثلا نشهد إسفافا لم نصادفه من قبل على كل المستويات (الكلمة واللحن والصوت) فنجد الكلام -لامؤاخذة- كلام "حشاشين" بيتكتب على القهاوي والملحن أصبح يلحن "ببقه" لامؤاخذة والصوت طبعا لا كلام عليه فنجد أن أقل القليل يغني والباقى "بيكاكي" في وشنا وتحولنا من "وأنا كل ما أقول التوبة" إلى "بحبك ياحمار" ومن عمالقة الغناء الشعبي أمثال عبد المطلب و رشدي و العزبي إلي سعد لامؤاخذة الصغنن الذي لاهو بيغني ولا هو شعبي وبصراحة "حاجة تقرف" فعلا إسفاف يصيبك بأنفلونزا الطيور
وربنا يكفينا ويكفيكم الشر
ونتواصل فيما بعد